عمري ما شفتها فيه قبل كده، رماني على الأرض وزقني برجله وهو بينهج وقالي بصوت فحيح زي الأفاعي بقى بتجيبي سيرة الخلع يا بنت؟ ورب العرش ما هسيبك، وهترقعي بالصوت وتتمني النظرة في الشقة دي، وريني بقى هتعملي إيه!، وسابني مرمية على الأرض ودخل الأوضة التانية ورزع الباب وراه قمت وأنا كلي بترعش، جسمي كله بيوجعني ودموعي مفيش منها فايدة، جريت على أوضة بناتي فتحتها ودخلت في حضنهم، كنا بنترعش إحنا التلاتة، بنتي الصغيرة كانت بتعيط وبتقولي أنا آسفة يا ماما أنا السبب عشان كسرت الكوباية، قطعت قلبي بكلامها، أخدتها في حضني وبست راسها وقولتلهم أنتم ملكمش ذنب، خلاص يا حبايب قلبي متخافوش، طول ما أنا عايشة محدش هيلمسكم فضلت صاحية طول الليل، باصة للسقف ودموعي بتنزل في صمت، شريط الكدب كله بيتعاد قدام عينيا.. مقطوع من شجرة! المشروع والتصاريح! كرامتي متسمحش أعيش في شقة مراتي! طلع كله فيلم هابط مترتب عشان يسرق شقى عمري وشقى بنات يتامى، وافتكرت الورقة.. القيد العائلي اللي لسه في شنطتي، متجوز وعنده تلات عيال! يعني هو فاتح بيت هناك بفلوسي وبأكلي، ومقضيها عندي لوكاندة وبياكل لحمة وفراخ على قفايا وقفا عيالي، وجاي في الآخر عايز ياخد الشقة!أول ما الشمس
طلعت، سمعت صوت باب الشقة بيتقفل، عرفت إنه نزل الشغل، قمت بسرعة ومسحت دموعي، وبصيت في المراية.. وشي كان معلم ومزرق، بس الوجع اللي في قلبي كان أقوى بكتير، الضعف اللي كنت فيه بالليل اتقلب لغل وقوة عمري ما حسيت بيها، قولت لنفسي لأ، أنا مش يتيمة ولا مكسورة، أنا أم، والأم بتتحول لوحش لو حد قرب من عيالها لبست بسرعة وخدت بناتي في إيدي ونزلت، أول مشوار كان على المستشفى الحكومي، عملت تقرير طبي بالضرب والكدمات اللي في وشي وجسمي، ومن هناك على قسم الشرطة، وقفت قدام الضابط وبكل ثبات طلعت التقرير الطبي وطلعت القيد العائلي وقولتله أنا عايزة أعمل محضر ضرب واعتداء، ومحضر إثبات حالة وتزوير وخداع.. البني آدم ده دخل بيتي على إنه عازب ودلوقتي بيبتزني في شقتي وشقى عيالي الأيتام الضابط بص في الورق وبص لوشي المتبهدل، وبان في عينيه التعاطف، وقالي متقلقيش يا مدام، حقك وحق بناتك هيرجع، بس لازم تروحي لمحامي فوراً يرفع قضية طلاق للضرر عشان التقرير ده والقيد العائلي يضمنوا ليكي حقك من غير ما تتنازلي عن شبر واحد خرجت من القسم وأنا حاسة إن الهوا بدأ يدخل صدري تاني، كلمت محامي زميلنا في الشغل بس في فرع تاني، حكيتله كل حاجة، الراجل صدمته كانت شديدة
وقالي دا نصاب ومحترف يا مدام، وعامل الحسبة دي عشان يطردك من شقتك، متقعديش معاه في مكان واحد أخدت بناتي ورحت عند جارتي أم أحمد، ست طيبة وماليش غيرها في الدنيا، أول ما شافتني شهقت واحتضنتني، حكيتلها وأنا بنهار، قالتلي وعينيها بتطق شرار والله ما هيدخل الشقة دي تاني، والمنطقة هنا كلها رجالة وأهو نشوف هيعمل إيه الساعة جت تمانية بالليل، تليفوني رن، كان هو، رديت ببرود تام مكنش يتوقعه، قالي بصوت كله ثقة وقرف أنا واقف تحت البيت، اخلصي انزلي افتحيلي عشان نسيت المفتاح، وجهزيلي لقمة أكلها عشان مش فايقلك قولتله بنبرة هزت تليفونه أنا مش في الشقة، وأنت ملكش عيش فيها تاني يا كداب يا متجوز يا أبو العيال، وباب الشقة ده لو عتبته تاني هحبسك، والمحضر معمول والتقرير الطبي والقيد العائلي في النيابة دلوقتي، وقضية الطلاق للضرر هتوصلك على شغلك بكرة الصبح الخط قطع لثواني، حسيت بصدمته وسكوته، وبعدها صوت نبرته اتقلب مية وتمانين درجة، وبدأ يزعق ويشتم ويهدد، قفلت السكة في وشه وعملتله بلوك، وبصيت لبناتي اللي كانوا باصين لي بفخر وخوف في نفس الوقت، واجهت عيونهم وابتسمت وقولتلهم خلاص يا بنات، الكابوس انتهى، وأبوكم الله يرحمه سابكم لمعلمة هتعرف تحميكم
وتجيب حقها وحقكم..عدت الأيام، وكنت فاكرة إن الموضوع هينتهي عند المحاضر والمحاكم، بس الندل المحترف مبيستسلمش بسهولة في يوم وأنا راجعة من الشغل وواخدة بناتي في إيدي، لسه بدخل الشارع لاقيت لمة ناس قدام باب عماراتي، وقلبي انقبض. قربت بسرعة، ولاقيت الجيران واقفين وهو واقف في النص، عمال يصرخ ويمثل دور الراجل المكسور، وعامل مندبة! أول ما شافني، شاور عليا وقال بصوت عالي عشان يسمّع الشارع كله أهي.. أهي الست اللي فتحت لها بيتي ورضيت بيها وببناتها الأيتام، وفي الآخر طردتني في الشارع وسرقت فلوس مشروعي اللي كنت مشغله ليها ولعيالها! يرضي ربنا يا ناس أرجع من شغلي ألاقي قفل الباب متبدل وهدومي مرمية بره؟الناس بدأت تبص لبعضها وتبص لي بنظرات لوم، والدم غلي في عروقي. بناتي جريوا استخبوا ورا ضهري وهم بيعيطوا من الخوف. مفيش ثانية، ولاقيت أم أحمد جارتي نازلة من العمارة زي الإعصار، وقفت في وشه وقالتله بصوت جهوري بس يا كداب يا نصاب! عامل فيها سبع البرمبة وأنت جاي تقعد في شقة ست وتصرف عليك؟أنا مسمحتلوش يكمل الفيلم بتاعه، سبت إيد بناتي ووقفت قدامه وبكل قوة وطلعت من شنطتي صور من المحضر وصورة القيد العائلي اللي كنت مخلية نسخ منهم معايا دايماً،
