سر زوجي بخصوص طلاق اختي حكايات نور محمد
جوزي داس على كرامة أختي المكسورة عشان يرضي غروره قدام عيلته.. فدمرت له كبرياءه وسبت له البيت، بس اللي اكتشفته بعدها كان كارثة!
عمري ما تخيلت إن الراجل اللي أديته عمري وشقيت معاه، ممكن يبيعني ويبيع كرامة أهلي في لحظة عشان يعمل فيها سي السيد قدام عيلته. بس يومها اتعلمت درس عمري الست اللي ترضى بالإهانة مرة، بتفضل طول عمرها تدفع التمن.
من أسبوعين، جوزي أحمد قالي وإحنا قاعدين بنشرب الشاي إيه رأيك نعزم الحجة والدتي وأخواتي يوم الجمعة الجاية؟ بقالهم كتير متجمعوش عندنا. أنا كأي ست مصرية أصيلة، رحبت جداً، وقلت له يا ريت، دي بركة، والبيت هينور.
وهنا قال لي الجملة اللي خلتني أطير من الفرحة وبالمرة اعزمي أختك نور معاهم، خليها تخرج من حالة الاكتئاب اللي هي فيها بعد طلاقها، وتغير جو معانا.
بصراحة كبر في نظري أوي، وحسيت إنه حاسس بوجع أختي الصغيرة اللي لسه طالعة من تجربة قاسية ومكسورة الخاطر.
يوم العزومة
من يوم الأربع وأنا قالبه البيت، مسحت ونضفت، ونزلت السوق جبت أحسن حاجة، ووقفت في المطبخ يومين كاملين عشان أعمل سفرة تشرف جوزي قدام أهله. حمام محشي، ومكرونة بشاميل، ومحاشي أشكال وألوان.
يوم الجمعة، عيلته وصلت، وبعدهم بشوية جت أختي نور وهي مكسوفة وهادية جداً.
بعد ما خلصنا أكل، قمت ألم السفرة. أختي نور بحسن نية وذوق قامت بسرعة عشان تساعدني وتدخل معايا الأطباق المطبخ. وهنا حصلت الصدمة اللي شلت تفكيري.
حماتي بصت لنور وقالت بنبرة فيها سخرية أيوة كده يا نور، اتحركي واشتغلي، أصل القعدة في بيت أبوكي بعد الطلاق بتعلم الكسل، ولازم تتعودي على الشقا عشان لو حد رضي بيكي بعد كده.
الكلمة نزلت زي خنجر في قلب أختي، وعينيها اتملت دموع وبصت في الأرض. أنا دمي غلى، وكنت لسه هرد وأقول لحماتي إن أختي ضيفة وتاج راسي، لقيت أحمد جوزي بيبص لي بتحذير، وبيكمل على كلام أمه وبيقول بصوت عالي قدام الكل
وهي أمي كدبت في إيه؟ سيبيها يا ياسمين تتعلم تخدم، ما هي لو كانت بتعرف تخدم وتشوف طلبات جوزها مكنش رماها ورجعهالكم! خدي يا نور، لمي بقية الأطباق دي واعمليلنا 10 كوبايات شاي هاتيها على الصالون.
حسيت إن الدنيا بتلف بيا. جوزي اللي قال إنه عازمها عشان يواسيها، جايبها عشان
بصيت له وقولت بصوت هادي بس كله غضب نور ضيفتي، ومحدش هيعمل الشاي غيري، ولو على الأطباق أنا هلمها.
فجأة أحمد قام وقف وضرب بإيده على الترابيزة وقال بعصبية أنا كلمتي مابتنزلش الأرض! أختك دي تاكل وتشرب وتخدم، ده بيتي وأنا اللي بمشيه، ولو مش عاجبها أو مش عاجبك، الباب يفوت جمل!.
في اللحظة دي، شريط حياتي كله مر قدام عيني. لو سكت دلوقتي، أنا وأختي هنداس طول العمر. بصيت لأختي اللي كانت بتترعش وبتبكي، ومسكت إيدها، ولفيت لأحمد وقولتله قدام أمه وأخواته
البيت اللي يتهان فيه ضيفي وأهلي، ميبقاش بيتي. وأنت طلعت أصغر بكتير من إني أكمل معاك يوم واحد.
دخلت الأوضة، لبست عبايتي، وأخدت أختي من إيدها، وسبت لهم البيت يضرب يقلب.. المطبخ مليان مواعين، والضيوف قاعدين، والشاي اللي كان طالبه متعملش.
أحمد كان فاكر إني هرجع أعيط، بس أنا عملت حاجة دمرت له كبرياءه المزيف. أحمد كان واخد مني سلفة كبيرة فلوس ورثي من جدي عشان يجدد عربيته، وكان دايماً يداري ده عن أهله ويعمل إنه هو اللي بيصرف عليا.
أول ما وصلت بيت أبويا، فتحت جروب العيلة بتاع الواتساب اللي فيه أمه وأخواته وأعمامه، وبعت صورة إيصالات الأمانة اللي كان ماضيلي
اللي بيعمل راجل قدام عيلته بيهين أهلي، ياريت الأول يبقى راجل ويسدد فلوس مراته اللي مستلفها عشان يركب عربية يتباهى بيها.. العزومة دي من فلوسي، بس خسارة في اللي مبيطمرش فيه.
وخرجت من الجروب وعملت له بلوك من كل حتة.
طبعاً الفضيحة بقت بجلاجل في عيلته، وصورته اللي كان بيرسمها اتهدت، وبقى منظره وحش جداً قدام أمه وأخواته.
بس المفاجأة اللي مكنتش على البال..
عدى 10 أيام، وأحمد حرفياً بيتجنن. بيبعت ناس تتدخل، وبيكلم أبويا يبكي ويقول إنه مستعد يجي يبوس فوق دماغ نور قدام العيلة كلها، وإنه مش عارف يعيش من غيري، وإن البيت من غيري يضرب يقلب.
كنت خلاص هحن وأفكر أسمع له، لحد ما امبارح بالليل..
وأنا بفرغ شنطة هدومي اللي أخدتها بسرعة يوم ما سيبت البيت، لقيت في وسط الهدوم فلاشة صغيرة بتاعت أحمد وقعت في الشنطة بالغلط من على التسريحة.
قلت أشغلها على اللاب توب أشوف فيها إيه يخص الشغل عشان أبعتهاله مع حد..
بس اللي شفته على الفلاشة دي خلاني ألطم على وشي، وعرفت إن العزومة دي وإهانته لأختي كانت مجرد تمثيلية عشان يغطي على مصيبة وكارثة أكبر بكتير هو عاملها من ورايا، والكارثة دي تخص...
الكاتبه_نور_محمد
...الكارثة دي تخص أختي نور وطليقها
